Tatar Ai - Юлда үскән арыш (Кадыйр Сибгатуллин)

Серкәләнеп уйный кырда арыш...
Туган йортка әле кайтып барыш,
бераз сагынып, бераз сагындырып,
үрәчәдән аяк салындырып.
Гаярь атлар каты басып бара,
тимер арба тирән эзләр сала...
Көпчәк үткәч, арыш торып кала,
торып кала, ләкин башы кара.

Юлда үскән башак шуңа дучар:
дегет белән буяп уза күчәр.
Әллә буш син, әллә тулы җелек -
арба күчәрендә җитә дегет.
арба күчәрендә җитә дегет.

Бергә-бергә бер келәттән чыккан,
кайсы кырда, кайсы юлда шыткан;
бусы юлга төшсен дип сайламый
чәчкәндер лә кеше абайламый.
Орлык булып йөктә барасың да,
ялгыш кына төшеп каласың да,
интегәсең чиста башың белән
дегет сөртеп көпчәк арасында.

Каныга бит мәрхәмәтсез язмыш,
бер башакта ничә арба сагыш!

Серкәләнеп уйный шул ук арыш,
дегет сөртеп тора шул ук арыш.
Бераз сагынып, бераз сагындырып,
үрәчәдән аяк салындырып,
кайтып барыш төрле уйлар уйлап,
арыш башын дегет белән буяп.