Tatar Ai - Яулык болгаулары (Кадыйр Сибгатуллин)

Безнең авыл тау астында ята,
мендәредер тауның итәге.
Үргә менгәч, борылып карый-карый
яулык болгый чыгып киткәне.
Болай гына болгый, берәр айдан,
берәр елдан кайтыр, әйләнер...
Яулык болгау хәзер ныграк итеп
сагыныр өчен матур хәйләдер.

Ә ул көнне без туарга калган,
кызыл яулык болгап киткәннәр.
Киткәннәр дә...
кайтып булмый торган
урыннарга барып җиткәннәр.
Газиз җанны туфрак иткәннәр.

Мираслары - тормыш - серле сарай,
кулыбызда алтын ачкычлар.
Авылыбызның биек үре кебек
һәйкәлләргә илткән баскычлар.
Сау бул, дисәң, - безнең үрләр биек,
кайтам дисәң, - безнең юл такыр.

Алардан соң яулык болгап китеп
кайттылар бит инде күп тапкыр.
Онытырлык юкса вакыт үткән,
киткәннәрен без бит күрмәгән.

Йөрәкләргә тия яулык очы,
болгасалар шушы үрләрдән.
яулык очы!
яулык очы!