Tatar Ai - Урзаем (Рима Мухаметдинова)

Эй, матур да инде бигрәк,
Туып үскән минем авылым.
Авылымның исеме аның -
Яратканым Урзаем.

Шунда тудым, шунда үстем,
Үтте шунда балачакларым.
Ике малай, алты кыз уйнап үстек,
Ихатадагы чирәмне тапап.

Иртән күзеңне ачуга,
Тәрәзәдән кояш елмая.
Шундый рәхәт күңелгә -
Йөгерәсе килә чыгып урамга.

Әтәчләр күптән уянганнар,
Кикерикүк, кикерикүк дип,
Таңнан оран салалар.
Тавыклары җимнәр эзләп,
Вак ташларны типкәлиләр.

Саф һава, кәеф яхшы,
Танауны ерып керә ачык тәрәзәдән.
Шомырт чәчкәләренең хуш исе,
Сиреньнәре, ә соң, сиреньнәренең дә бар исе.

Урзай, Урзай, су буйларың искә төшә.
Шакир әти чишмәсе чыкмый исләрдән.
Каз бәбкәләре йөзә елгада,
Су керәбез, бала чакта, үзебез дә.

Урзаем да урамнар күп,
Минем урам - Башкорт урамы.
Үземнең авылым урамы һәм йортымнан да
Якынырагы юктыр, мөгаен.

Эй, Урзаем, Урзаем,
Авылкаем, гүзәлем.
Эчкән сулар, ялан тәпи йөргән сукмаклар -
Һич истән чыкмаслар, Ходаем.

Һәрчак истә шифалы тау башында
Үскән кыргый суган тәмнәре,
Җиләк җыйган каенлыклар
Һәм дә шунда үткән сабантуйлар.

Рәхмәтлемен туган авылым Урзаема,
Горурланам шунда үземнең туганыма.
Рәхмәтлемен шулай ук эчкән суларыма.