Tatar Ai - Усаклар (Кадыйр Сибгатуллин)

Җырның матурларын малай чакта
урманнарда тынып тыңладык.
Олылардан качып үзебез дә
урманнарга китеп җырладык.
Аңлап түгел,
болай яраттык без
табигатьнең һәр тын алышын.

Бер җырга да алыштыра алмыйм
усак шавын,
урман тавышын.
Җилсез шаулый алар...

Мин аларның
тынмас җанын һаман аңламыйм.
Усак төпләреннән китә алмыйм,
һаман малай,
һаман бала мин.
Һаман малай,
һаман бала мин.

Җанымның да шундый көйләре бар,
рәхәт тоеп йөрим мин аннан.
Малай вакыттан ук ияреп килгән
матур көйләр миңа урманнан.

Инде юллар урман юлы түгел,
күптән үтте инде ул чаклар.

Барам көйләп, -
миннән бераз алда
лебердәшеп бара усаклар...
усаклар...
усаклар...