Tatar Ai - Ышану (Кадыйр Сибгатуллин)

Бер гадәт бар.
Гадәт кенә түгел,
ул кагыйдә инде тормышта.
Әйтерсең лә
шушы кагыйдәләр
ияреп килә безгә тумыштан.
Нигезе бар үзенең,
формуласы:
«шулай тиеш», «шулай кирәк» ди.
Исбатлап та бирә:
бу дөньяда
ышанырлык кеше сирәк, ди.

Акылга да сыеп бетми кебек:
Кеше дигән затка ышанма!
Актарыла минем хисләр кайчак,
йөрәгеңне тот та тышаула!

Бәгыреңә пычак булып керә,
алдануы авыр авырын...
Кыенлыгын беләм
ышануга
алданулар аша баруның.
Алдасыннар мине, -
бер алдасын,
ике,
өч кат мине алдасын.

Түзә алам,
бары минем аңа
ышануымны ул аңласын.
Аллага да,
кешегә дә биргән
ышанырга дигән антым юк.
Ышанмасаң, бәлки, ансаттадыр,
ышанмаска ләкин хакым юк.

Ышанамы миңа кеше үзе?
Ышанмаса бик тә кызганыч.

Бәгыреңә пычак булып керә,
алдануы авыр авырын...
Кыенлыгын беләм
ышануга
алданулар аша баруның.
Алдасыннар мине, -
бер алдасын,
ике,
өч кат мине алдасын.

Алдасыннар мине,
алдасыннар мине,
алдасыннар мине!

Җанымдагы бөтен законнарның
кодексы - минем ышаныч!
Ышаныч!
Ышаныч!